højskoleavisen

harðfiskur og baðkar

2004-12-18T22:45:00.000+01:00

Ég vil byrja á að þakka mömmu og Þorgeiri fyrir afskaplega huggulega heimsókn síðustu helgi, það var svo gaman að fá gesti.

Annað markvert sem gerðist þessa síðastliðna viku;
-vakinn kl.3:30 á aðfaranótt þriðjudags með
-vöknuðum við pokaskrjáfur aðfaranótt miðvikudags. Búið var að naga í gengum þrjú lög af plastpokum sem innihéldu rammíslenskan harðfisk. Við fundum aldrei sökudólginn.
-3 sýningar af RENT, hver annari betri. Búið að bjóða okkur samning á Broadway
-Opið hús á fimmtudag. Aumingja þið að hafa misst af því
-Þrif í gær
-Þrif og pakka í dag
-Háðíðarkvöldverður í kvöld

Tökum rútuna kl.12 á morgun. Get ekki neitað því að þetta er soldið skrítið. Búin að vera með sama fólkinu, í saman umhverfinu síðustu fjóra mánuði og svo er það bara "allt í einu" búið. Soldið skrítið. Ekki gott og ekki slæmt, bara soldið skrítið. Ætlum að hygga okkur síðustu tvo dagana í köben, kíkja á jólamarkað í Stínu, ganga Línuna svona 15x og bara sjúga inn dönsk jól.

Stígum svo á klakann seint á mánudagskvöld. Reikna með að sofa í baðkarinu þá nótt og vonandi borða grjónagrautinn hans pabba í morgunmat, hádegismat og kvöldmat á þriðjudag.

Góðar stundir.

pigen:)

opið hus

2004-12-06T18:03:00.000+01:00

Síðasta helgi var Japönsk. Á föstudagskvöldið horfðum við á japanska teiknimynd sem er bara með þeim betri sem ég hef sé. Altso teiknimynd, ég hef ekki séð þær svo margar japanskar. Á laugardeginum voru svo hin ýmsu "work shops". Leó fór í karate og ég lærði ýmislegt um japanska menningu og siði. Lærði meðal annars að á japönskum hótelum eru upphitaðar klósettsetur og að ef þú gleymir veskinu þínu á veitingastað mun það garanterað standa á sama stað,óhreyft, þegar þú sækir það þremur tímum seinna. Sel þetta ekki dýrara en ég keypti það.
Eftir hádegi gerðum við svo sushi, ummmmmm. Fullt, fullt, fullt af sushi, ummmmm. Rúlluðum upp svona þararúllum með ýmsu gumsi í og gerðum líka hrísgrjónakúlur með rækjum, krabbalkjöti, gulrótum og fleira sniðugu.
Klukkan 18:00 var svo hlaðborð með "all you can eat of sushi" en þá hafði ég enga matarlyst. Það var sossum auðvitað, örugglega eina skiptið á ævinni sem ég mun ekki þurfa að borga 500kr ísl fyrir hvern munnbita af sushi. Gæti þurft að fara í leiðangur út í fjöru þegar ég kem heim.

Talandi um heim. Eftir tvær vikur og 6 tíma præcis munum við lenda á klakanum, rétt í tæka tíð til að dusta rikið af hillunum og kaupa síðustu pakkana. Nei, þeir verða ekki danskir, þá yrði okkur ekki hleypt um borð, hættan á að flugvélin myndi hrapa vegna yfirviktar væri of mikil. Nú halda allir að þeir fái risastóra og þunga jólapakka frá Hildi og Leó:)

Fyrir ykkur sem enn hafið ekki komið í heimsókn til okkar (sem á við alla, nema mömmu og Þorgeir sem ætla að kíkja í kaffi á föstudag),þá er opið hús þann 16.des. Þar verða sýnd málvek og ljósmyndir, kórsöngur fluttur, stuttmyndir sýndar og RENT frumlutt, matur borðaður og bjór drukkinn. Annars þarf ekkert að vera opið hús, þið eruð alltaf velkomin.

pigen;)

Æbleskiver og julefrukost

2004-11-30T19:18:00.000+01:00

Skelltum okkur til höfuðborg norðursins um helgina. Mikið var hún falleg, margar litlar götur með mörgum litlum húsum. Borðuðum kínamat, fórum í bíó og röltum um í góða verðinu. Meget hyggligt

Jólahlaðborð á síðasta föstudag og jólahlaðborð á fimmtudag. Snaps með jólahlaðborðinu á síðasta föstudag, ekkert snaps með jólahlaðborðinu á fimmtudaginn. Aldrei aftur snaps. Synd og skömm að skemma svona góðan mat með snapsi.

julefrukost = jólakvöldverðarhlaðborð
æbleskiver = pönnukökur sem eru eins og litlir boltar í laginu, borðaðar með sultu og flórsykri.

Á hverjum degi, rétt fyrir hádegi kemur póstmaðurinn. Oftast kemur hann bara með póst en síðustu tvo daga hefur hann komið með marga, marga pakka. Enginn þeirra er til okkar. Þetta eru nefninlega aðventupakkar.

Þar sem að það hefur gengið svo ótrúlega vel með fyrsta fyrirtækið sem ég stofnaði þá er ég að hugsa um að stofna annað. Segi ykkur betur frá því seinna.

pigen;)

Eitt sinn ballerina ekki alltaf ballerina

2004-11-25T19:06:00.000+01:00

Nú er ég hætt að gorta mig af því að ég hafi einu sinni verði fimleikadrottning, ballerína og jazzballettdansmey. Það hjálpar mér allavegana ekki mikið á dansæfingum fyrir RENT. Kannski af því að ég var 6 ára þegar ég var ballerína, 7 ára þegar ég meikaði það í jazzballettheiminum og 12 ára þegar ég vann brons á innanfélagsmóti Gróttu í fimleikum (keppendur voru 8 talsins). Æfingar ganga hægt. Hefði ekki trúað því hvað það er mikklu meiri vinna í söngleik en í bara í venjulegu leikriti; kóræfingar, dansæfingar, búningavinnsla, einsöngsæfingar (ég þarf þó ekki að mæta þar),auk bara almennra texta og leikæfinga.

Kórtónleikar á morgun. 38 af 60 nemendum skólans...það ekki margir áheyrendur.

Góðar stundir

pigen;)

Nú tel ég upp að þremur og þá vaknarðu

2004-11-24T17:55:00.000+01:00

Ertu orðin/n þreytt/ur á að gera ekki neitt? Finnst þér allt vera leiðinlegt? Er kuldinn og myrkrið alveg að fara með þig?
Ef þú svarar einni eða fleirum af ofangreindum spurningum játandi, mælir undirrituð með að þú skellir þér á dáleiðslufund (helst með einhverjum sem þú þekkir sem er tilbúin/n að láta dáleiða sig)
Var einmitt einn svoleiðis haldinn, hér í Brandbjerg, í gærkvöldi og hefur undirrituð ALDREI hlegið eins mikið. Var þetta sem kaninn myndi kalla hillarious.
Veit að það var illa gert að hlæja svona að aumingjans fólkinu sem hafði ekki minnstu hugmynd um að það væri að: byggja ímyndaða sandkastala, leika æsta stuðningsmenn á fótboltaleik, kalla á mömmu sína og vera saklausir farþegar í lest með fullt af niðurrifnum dagblöðum inn á sér...en þau fóru öll upp sem sjálfboðaliðar þannig að það er kannski alveg pínu allt í lagi. Hélt áfram að hlæja þegar ég vaknaði í morgun:)

pigen;)

jóla hvað?

2004-11-06T17:47:00.000+01:00

Já, jólin komu í Danmörku í gær. Ekki seinna vænna, enda kominn 5.nóv. Þau komu kl.20:59 að staðartíma með komu "jólatuborgsins". Ákváðum að klára Danapakkann til fulls og skelltum okkur á einn helsta skemmtistað Vejle. Stöndum fyrir utan í röð þegar það byrjar að snjóa, bara allt í einu. Það var ekkert svona eitt snjókorn og síðan annað og þriðja heldur bara snjóstormur. Það findna var að það snjóaði ekki á fólkið hinu meginn við götuna heldur bara okkur. Þegar betur var að gáð reyndist umræddur snjór vera all froðukenndur og var ekki laust við að hann lyktaði eins og hreinsiefnið AJAX. Sem sagt hann lyktaði eins og nýþvegið baðherbergi. Hann kom innanfrá og út um glugga á skemmtistaðnum. Þegar inn var komið komumst við að því hvaðan AJAX snjórinn kom, nefnilega úr Tuborgjólalandinu. Inni var búið að skreyta allt hátt og lágt, gerfi snjór á gólfinu, fullskreytt jólatré á miðju dansgólfinu og barþjónar klæddir eins og rauði maðurinn með hvíta skeggið. Jólalögin ómuðu; "Last Christmas I gave you my heart..."

pickuplína dagsins: "Augun þín glitra eins og flísarnar á baðherberginu mínu"...sem ég notabene var einn og hálfan tíma að skrúbba í dag, kalk, kalk, kalk og meira kalk!

Gleðileg jól börnin mín

pigen;)

Boooooo

2004-11-03T13:49:00.000+01:00

Um helgina var þemahelgi. Halloween. Á föstudagskvöldinu var horft á "Texas chainsaw massacre" og þar á eftir vorum við send í hópum út í skóg í hryllingsgöngu. Hún reyndist meira blaut og köld en hryllingsleg en úti ringdi þremur Atlandshöfum. Á laugardagskvöldinu var hryllingsball með tilheyrandi búningum, skreytingum og grænum fordrykk með sjálflýsandi kónguló ofaní. Matsalnum var breytt í geðveikraspítala hvítir plastdúkar á borðum og skær kastljós lýstu upp salinn. Matseðillinn var hakk og spakettí, bleikt brauð, salat og eiturgræn salatdressing. Einu áhöldin til að borða með var súpuskeið.

Við ykkur sem eruð komin yfir 19 og orðin desperat á að finna ykkur nokkurn tíman partner, vil ég benda á lýðháskóla í Danmörku. Fyrir tveimur mánuðum vorum við eina parið í skólanum en nú teljast mér þau vera sex...eða sjö, þetta er eitthvað smá óljóst, you know what I mean. Leitið og þér munið finna!!!

pigen;)

trallarallala

2004-10-27T21:11:00.000+02:00

A manudaginn komu sex nyjir nemendur. Líst frekar vel á þá, lykta allavegana ekkert mjøg illa og brosa alveg út i annad. Það rétti líka aðeins af kynjahlutfallid en nú eru um 17 strákar og aðeins 42 stelpur.

Ny "önn" byrjadi í dag. Fyrsti tíminn minn var ljósmyndun fyrir byrjendur, aftur. Einnig valdi eg textíhönnun, tónheyrn, kór (þetta er allt i lagi, þið munið ekkert heyra í mér og þeir sem verða med mér í kór munu hvort eð er líklegast aldrei sjá mig aftur), og síðast en ekki síst valdi eg söngleik:/ RENT. Já hlæðu bara, þetta er sko ekkert fyndið heldur fúlasta alvara. Líka búið ad biðja mig um að vera hjómbordsleikara i söngleikjahljómsveitinni. Puhe, eins og Daninn segir. Eftir ad hafa legið andvaka í alla nótt og reynt ad raula eitt lagana fyrir munni mér og rifja upp nóturnar á hljómborðinu, hef ég ákvedid að hætta við hvoru tveggja og fara i málaralist. Er alveg hand viss um ad það blundi í mér Picasso einhverstaðar þarna undir.

pigen;)

Tékjuí

2004-10-27T17:49:00.000+02:00

Ég gefst upp! Það tók mig fimm daga að byrja að skrifa ferðasöguna og nú, rúmri viku eftir að við komum heim frá Tékklandi, er ég ekki einu sinni hálfnuð. Ætlaði mér að hafa hana frekar ítarlega og skemmtilega. En allavegana. Það var mjög gaman og mjög erfitt. Komst meðal annars að því að ég ætla ekki að verða kanósiglari, ekki klettaklifrari, ekki FJALLAhjólakona og ekki kampus/ratleikshlaupari (orientering). Einnig komst ég að því eftir að hafa séð óperuna Carmen að Tékkar syngja ágætlega en ættu að sleppa því að tala frönsku. Fórum á stærsta svartamarkað sem ég hef vitað um, þar voru, mörg, mörg stolin úr og mjög ljót, fölsuð föt. En aftur á móti fínar töskur, skelltum okkur á sitthvora.

Varúð til allra grænmetisætna þarna úti, ekki flytja til Tékklands!!!

pigen;)

Danmörk i dag, Tekkland a morgun

2004-10-12T16:39:00.000+02:00

Á eftir leggjum við af stað til Tékklands. Nei, við erum ekki að fara til Tékklands á eftir því við fyrst þurfum við að sitja í 18 tíma í rútu áður en við komumst til Tékklands sem þýðir að við munum ekki koma til Tékklands fyrr en á morgun. Það á að troða öllum skólanum í eitt stykki svefnrútu, hvernig sem þær nú virka og keyra þangað niðureftir. Verðum 3 daga í sveitasælu Tékklands og 3 daga í höfuðborginni Prag. Prógrammið er mjög stíft en ég mun segja ykkur betur frá því þegar við komum til baka en ég get sagt ykkur að það inniheldur mun meira af sportástundun en menningu.

Minni svo á að ef þú þarft að koma til okkar skilaboðum þá er það hægt hér á síðunni, á hildurlola83@hotmail.com eða á leostef@simnet.is

Vona að þið hafið það gott lömbin mín.

pigen;)

menningin getur verið svo margvísleg

2004-10-11T19:22:00.000+02:00

Jú menning var það svo sannarlega. Komum til Köben rúmlega 21 á fimmtudagskvöld og áttum þá eftir að finna stað til að sofa á. Leó segir strax að það eigi örugglega eftir að taka okkur svona 2 tíma. "Tvo tíma, ég er viss um að við verðum sofnuð á einhverju sætu gistiheimili eftir svona hálftíma!" Right Hildur!!!Fundum ekki eitt skilti sem á stóð "guest house" Eftir um tveggja tíma rölt á milli hótela (sem öll kostuðu yfir 7.000kr nóttin), tékkuðum við okkur inn á hostel, rétt hjá Nörreport. Eftir að hafa gist á stórum hluta hostela Evrópu síðasa sumar þá er ég ekki í vafa um að þetta er það skítugasta og dýrasta í vestur Evrópu. Sængurfötin voru svona 30 ára gömul og morgunmaturinn óætur. Á rölti okkar um borgina rákumst við á stafla af gulusíðunum í Danmörku og kipptum einu stykki með okkur. Eftir að hafa pirrast og skammast yfir ömurlegum örlögum okkar inni á litla kojuherberginu í smá tíma, föttuðum við að við þyrftum ekkert að sætta okkur við þetta. Flettum upp "guest house", "gæste hus", geste hus", "gæste værelse" í gulu bókinni. En án árangurs. Fyrirbærið gistiheimili þekkist ekki í Danmörku. Sváfum mjög illa þá nótt.

Á föstudeginum fórum á uppló ungafólksins og í gegnum það fengum við heimagistingu næstu nótt. Hún var ódýrari en ég veit ekki hvort það hafi verið mikið skárra. Turned out to be hommi í eldri kanntinum sem varð svona líka yfir sig hrifinn af Leó. Dásamaði augun hans og hár í bak og fyrir og fannst röddin líka hljóma svo fallega. Hafði einfaldlega ekki af honum augun. Minni var hætt að standa á sama. Baðherbergið var með meiri af lotion og aloe vera kremum en ég hef átt á allri minni ævi. Hann átti 3 tannbursta. Annars hlýtur að vera einmanalegt að vera einhleypur hommi kominn á þennan aldur. Bankaði á dyrnar hjá okkur kl.10 á sunnudagsmorgun og sagði að það yrði tilbúið kaffi eftir 5mín. Tveir lítrar af pressukaffi, átti nú heldur betur að halda okkur sem lengst. Svo var spjallað. Íbúðin einkenndist af minjagripum frá Japan. Sex stykki sverð, það ódýrasta kostaði 30.000dkk, það dýrasta miklu, miklu meira.

Borðuðum mikið af góðum mat, drukkum vín, keyptum appelsínugulan kjól, röndóttar buxur, eina jóla jólagjöf og sugum menninguna í okkur á Menninganótt Dana. Helgin var dásamleg

pigen;)

menninganott i Köben

2004-10-07T16:20:00.000+02:00

Erum farin í menningareisu til Kóngsins Köben. Góða helgi

pigen;)

mús eða lifrakæfa?

2004-10-04T16:24:00.000+02:00

Það eru nú búnar að vera þrjár højskoleweekend síðan við komum. Sú fyrsta var mest til að þjappa hópnum saman, önnur var ólimpíuhelgin og nú síðastliðnu helgi var ævintýraþema. Þetta voru allt saman mjög góðar og skemmtilegar helgar með íþóttum, fyrirlestri um Tolken og fínum böllum. En það er eitt sem Daninn klikkar á og það er hópavinna. Fyrstu helgina áttu allir að kynna þann stað sem þeir komu frá (Ísland í okkar tilfelli). Þrír og þrír staðir voru saman og fengu 5mínútur samtals til að flytja kynninguna og 5 tíma til að undirbúa hana, einn heilan tíma fyrir hverja mínútu. Ævintýrahelgina fengu 9, 10 manna hópar ævintýri sem átti að æfa og sýna fyrir hina. Leikritið átti að vera 5 mín, max 8. Klukkan 20-23 á föstudagskvöldið var ákveðið hvernig leikritið ætti að vera, hver ætti að vera hvað og hvað allir áttu að segja. Á laugardagsmorgun var æft í einn tíma. Ég stakk upp á því að við spynnum þetta bara á staðnum. "já,það er sniðug hugmynd! Þá getur þú bara staðið við flygilinn þegar ég kem inn og sagt once uppon a time...og þegar Jakob ætlar að setjast niður í stólinn, þá kemur Stína inn og býður góðan dag og þá veit ég að ég á að leggjast niður og kveinka mér"...einum tíma seinna var tilbúið mjög fullkomið handrit með staðsetningum og setningum allra leikaranna. sýningin gekk ágætlega.

Hef alltaf fundist frekar súrt að vera með "músabrúnt hár" (en ekki bara brúnt eða ljósbrúnt)...í Danmörku er ég með lifrakæfulitað hár "leverpostej farver". og ég sem borða ekki einu sinni lifrakæfu. Held ég liti hárið ljóst næst.

pigen;)

Gott eða slæmt?

2004-09-28T14:51:00.000+02:00

Er farin að efast um að þessi dvöl okkar hér í Danaveldinu hafi jákvæð áhrif á okkur. Það virðist ekki vera nokkur leið fyrir mig að komast í gegnum daginn án þess að halla mér í svona klukkutíma (í það minnsta) eftir hádegi og mér er farið að finnast allt í lagi að sleppa morgunmat til að fá að kúra aðeins lengur. Hins vegar reynist það erfitt um helgar því Leó er rokinn á fætur milli 9 og 10 einfaldega af því að hann vill ekki sofa lengur og vill taka daginn snemma, þrátt fyrir að hafa farið að sofa fyrir miðnætti alla vikuna.

Heima á Íslandi var þetta aðeins öðruvísi:
Hildur; "Leó minn, það er alveg hræðilegur ávani að leggja sig alltaf á daginn, hugsaðu þér allt sem þú gætir varið þessum dýrmæta tíma í, eitthvað annað en að vera í draumalandinu"

Leó, kl.12 á sunnudegi;rétt búinn að opna augun "ummm, kúrum "aðeins lengur", gerðu það"

Það er komið haust í Danmörku

pigen;)

Engin leti

2004-09-26T23:12:00.000+02:00

Sjáum nú til. Síðasta færslan mín var 12. september. Hvað hef ég verið að gera svona merkilegt síðan þá? Hversvegna er ég ekki búinn að blogga? Ein af skýringunum gæti verið sú að ég hef verið duglegur að skrifa fólki ímeil. Sumir fá fleiri ímeil en aðrir, aðrir fá færri. Önnur skýringin gæti verið sú að það hafi verið of mikið að gera hjá mér. Það er sennilega ekki alveg rétt. Það er jú búið að vera nóg að gera, en ég hef yfirleitt tíma á kvöldin til að gera það sem mér sýnist. Ég get ekki borið fyrir mig að ég sé latur. Ég er sennilega ekki nógu latur. Það þarf ákveðna leti til að setjast fyrir framan tölvuna og blogga. Niðurstaðan er sennilega sú að ég hef enga afsökun fyrir að hafa ekki bloggað í tvær vikur. Ég er ekki einusinni latur.

Síðustu dagar hafa verið frábærir. Þessa helgina höfum við átt frí. Það var nýtt í smá djamm á föstudagskvöldið, þó ekki lengi fram eftir því við ætluðum að ná strætó til Vejle morgunin eftir. Á laugardögum eru nefnilega bara tvær strætóferðir á dag til Vejle. Ein klukkan níu og hin klukkan tólf. Strætókerfið í Reykjavík er himneskt miðað við í sveitinni hjá okkur.
Í Vejle keyptum við:

velúr-teppi, 150x200cm
Läkerol, rautt
möppu, bláa
plastvasa f. myndir, 25stk
íþróttaskó, hvíta, innandyra

Einnig ætlaði ég að kaupa mér buxur í en komst að því að sú verslun er ekki sú sama og í Kaupmannahöfn, hún er eingöngu fyrir konur og börn.

Í dag var tiltekt. /Leó

Á fóninum: Jonas Johansen / Move 'Up!

Það er sko ekkert grín að vera í lýðáskóla

2004-09-20T14:29:00.000+02:00

fyrir ykkur sem haldið að það sé eitthvað djók að vera í lýðháskóla og að maður þurfi ekki að gera neitt þá er það algjör misskilningur. Ég reikna með að flestir hafi átt frí um helgina eins og lög gera ráð fyrir en það var langt frá því að við ættum frí. Vorum búin að láta okkur hlakka mikið til að lyggja yfir video á föstudagskvöldinu, alveg búin á því eftir vikuna. En nei, það var ekki svo gott. Kl.19:30 var fyrirlestur um sögu Rómverja og Ólimpíuleikana. Var reyndar stuttur, ekki nema 30mín. Eftir það var skipt í lið og átti hvert lið að finna sér nafn á "landið sitt" og átti nafnið að vera í grískum stíl.(Mitt hét Diskukneppos). Einnig átti hvert lið að búa til fánafánin (okkar kjúkklingur með eitt auga á miðju enninu) og slagorð. Vorum búin 22:30. Svo var ekkert sem hét að sofa frameftir því það var laugardagur heldur var morgunmatur kl.8.00. Ólimpíleikar Brandbjerg voru svo settir kl.9:15 að staðartíma. Keppt var í fótbolta, körfu, bandí, frispí, pokahlaupi, og fólksburði. Diskukneppos lenti í 4.sæti af fjórum. Um kvöldið klæddu allir sig upp að hætti Rómverja (og MR-inga), vafðir inn í lök með kransa á höfðinu. Háðíðarkvöldverður var snæddur á pullum á gólfinu. Þetta var kannski ekkert of slæmt en þegar maður býr á heimavist þá er ekkert sem heitir að beila á partýinu því maður nennir ekki eða líður ekki vel; "bíddu þú varst eldhress í pokahlaupinu í dag, auðvitað mætirðu í matinn." Það var frekar kómískt að sjá 70 lök, í misgóðu ástandi, dansa vilt og galið. Á sunnudaginn var heldur ekki frí. Þá urðum við að þrífa eftir partýið og svo var boðið upp á brómberjatýnsluferð sem ég varð náttlega ekkert að fara í en fanst samt eins og ég yrði að fara og fór.

Heimavinnan síðan ég byrjaði í skólanum; taka myndir, skrifa tvær greinar, æfa mig að spila á þau hljóðfæri sem mig langar til að læra að spila á.

pigen;)

skal vi hygge os?

2004-09-17T16:19:00.000+02:00

Já, lífið gengur sinn vanagang hér í Brandbjerg. Morgunmatur kl.8, fundur og söngur kl.8:30, tímar 9-12, borða góðan mat 12-12:30, tímar 14-16:30 og kvöldmatur kl.18. Svo "hugga maður sig" annaðhvort í arinstofunni eða yfir fyrirlestri, nú eða maður "huggar sig" við billiardborðið. einnig er hægt að "hugga sig" yfir góðri mynd, og alltaf er klassískt að "hugga sig" yfir trivial og øl. Kaffihúsið/barinn opnaði í vikunni. Það er bara næstum eins og maður sé kominn á Kaffibarinn eða Kaffikúltúra. Rauðvín og øl á borðum, sígarettureykur og jazz. Jazzkennarinn og blaðamennskukennarinn standa fyrir aftan barinn. Mjög góð stemma.

Held það sé fædd stórstjarna í herbergi 303. Nei, ekki ég, heldur hinn íbúi herbergis 303. Bræddi mig alveg hjarta mitt með söng sínum fyrir allan skólan. Algjör hetja!

Það er ólimpíuhelgi framundan. Búin að skra mig sem dómara í fótbolta,körfubolta og bandí. Má ekki örgglega kasta fótboltanum í markið ef maður er fyrir innan teiginn???

Ætla að farað þvo þvott

góða helgi öll sömul

pigen:)

2004-09-12T22:48:00.000+02:00

Síðustu tvo daga erum við búin að hjóla samtals 47 kílómetra. Helminginn niður brekku, og hinn helminginn upp.

Úff.

Kæri Bush...

2004-09-12T01:11:00.000+02:00

Áðan átti ég vægast sagt mjög athygglisverðar samræður við ungverskan samnemanda minn. Þessi ágæta stúlka heldur því fram að það séu aðeins þrjár reglur í heiminum (lífinu),nr,1 "þeir hæfustu komast af", nr.2 það er ekki til neitt og mun aldrei vera til neitt sem heitir "að allir eru jafnir", og... ég náði ekki þriðju reglunni. Henni þykir "very normal and of course" að fólk drepi hvort annað og beiti hvort annað ofbeldi því annars yrði allt of mikil fjölgun hjá mannkyninu. Hennar EINA markmið í lífinu er að verða rík. Hún talaði frá ynnstu hjartarótum, það gat ég heyrt. Móðir þessarar stúlku sendi henni 40.000 leðurkápu í gær (hafði gleymt að taka verðmiðann af). Mamma, ekki senda mér 40.000kr leðurkápu!!! Þessi áðurnefnda stelpa þolir ekki listir, skilur ekki tónlist og finnst leiðinlegt að skrifa. Hún er í Brandbjerg Højskole af því að hún fær það frítt.
Held ég verði að farað koma mér í koj og huxa smá um þetta, kannski hef ég bara misskilið tilganginn með þessu öllu saman svona hrapalega, kannski ég ætti að senda Bush bréf og þakka honum fyrir að sporna við offjölgun mannkynsins.

pigen;)

Hrossafluguhræ og kóngulóavefir

2004-09-11T20:04:00.000+02:00

ég held að sólin hafi loksins áttað sig á því hvað hún hefur lítið skinið á mig það sem af er ævi minni og hefur þess vegna síðustu daga reynt að bæta mér það upp. Henni hefur tekist það alveg ágætlega og er ég henni mjög þakklát fyrir að að minnsta kosti reyna, þó svo að hún eigi enn mjög langt í land.

Eins og áður hefur komið fram þá eigum við frí þessa helgi. Skruppum inn í Vejle í gær að versla smá inn til heimilisins, kex, sjampó, 3 vínflöskur (kostuðu samtals 100dkk og var þessi sem opnuð var í gær nánast ódrekkanleg. Vatnsflaska með svona tveimur decilitrum af rauðvíni útí), nammi, djús, kassi af bjór (það var mikið hlegið af okkur þegar við komum með hann upp í skóla því hann var bara 24 flöskur en ekki 30, ég vissi bara ekki hvert Danirnir ætluðu þeir voru svo hneigslaðir) og hrökkbrauð.

Í dag var dagurinn tekinn svona semi snemma. Borðað mokost og síðan var það ekki umflúið lengur, herbergið varð að þrífa. Leó lagðist á fjórar inná bað með skrúbb í hendi að taka kalk af flísunum. (talað um það á næstum hverju einasta fundi, "munið að þrífa kalkið af flísunum") og mín réðst til atlögu við hrossafluguhræ og kóngulóavefi með ryksugunni. Útkoman var bara frekar góð.

Okkur leist svo vel á Vejle í gær (altso göngugötuna í Velje, hún var það eina sem við sáum) að ákveðið var að hjóla þangað í dag...það ætla ég aldrei að gera aftur. Hva, það eru bara 11km til Vejle, pís of keik. Já kannski TIL Vejle en til baka FRÁ Vejle,eru líka 11km,upp brekkur skógarinns. Ég held að blótsyrðin og "ÉG GET EKKI MEIR" hafi örugglega heyrst til Kúbu.

Stjörnurnar í Danmörku eru svo margar að það er það er ekki hægt að telja þær.

pigen:)

Hugh Grant

2004-09-10T10:17:00.000+02:00

í morgun fengum við að sofa út, þ.a.e.s. við Hildur áttum frí í morgun. Það þýðir líka að við fáum ekki morgunmat vegna þess að hann er borinn fram klukkan átta og svo tekinn af borðinu hálftíma síðar. Nú er klukkan rúmlega tíu. Við erum að fara í tíma eftir smá stund. Hildur fer í pólitík og ég fer í vocal performance þar sem ég á að syngja einsöng. Ég veit ekki alveg með það.
Vorum við eitthvað búin að minnast á á hvaða aldri fólk er hérna? Sá yngsti er sennilega 18 ára og sá elsti, sem er eini kynbróðir minn í vocal performance, er 39 ára. Fyrst þegar ég sá hann hélt ég að Hugh Grant hefði tekið upp á því að fara í danskan lýðháskóla, því þeir eru alveg eins. Ég er semsagt að fara að hlusta á Hugh Grant syngja.

Á himninum: sól akkúrat núna, þúsund stjörnur í gærkvöldi.
Á fóninum: Jens Winther & Metropole Orchestra / Pluto And Beyond

husin standa upp a gatt

2004-09-09T23:56:00.000+02:00

veit ekki alveg afhverju fólk (sjóðir) sem hafa aldrei talað við mig, hvað þá séð mig, ættu að borga mér fyrir að vera í lýðháskóla. Þið megið ekki misskilja mig, ég er alveg hæstánægð með að skólagjöldin mín hafa lækkað um 8500dkk síðustu 3 daga og gætu jafnvel lækkað enn meira áður en önnin er búin.

ljósmyndakennari: svo hangir lykillinn bara inni á klósetti svo þið getið framkallað þegar þið viljið. Filmurnar liggja inni í herbegi og pappírinn er við framköllunargræjurnar.

handavinnukennarinn: Munið svo bara að loka krukkunum þegar þið eruð búin að taka þær tölur sem þið viljið og ef þið eruð hér lengur en til miðættis, slökkvið þá ljósin

Tónlistarkennari: inni í þessu húsi eiga að vera 2 trommusett,3 hljómborð,tveir rafmagnsgítarar,billjón bongotrommur,5 mígríofónar,einn rafmagnsbassi og þríhorn. Ef þið hafið aldrei spilað á gítar áður þá er rafmagnsgítar tengudur svona og kveikt er á hammond orgelinu með því að hækka upp í þessum magnara og mígrófónarnir fara svona í statífin.
Nemandi (sem hefur aldrei séð hlóðfæri áður): En getur ekki eitthvað bilað ef magnarinn er vitlaust stilltur.
Tónlistarkennari: Jú, en þú munt komast að því ef það gerist. Ekki svo spila of hátt eftir kl.23

...ég meina,manni er ekki einu sinni treyst fyrir tölvunum í MH hvað þá meira

Góða helgi

pigen;)

fotograf

2004-09-06T13:15:00.000+02:00

Í morgun framkallaði ég fyrstu filmuna mína. Höfðum fjóra daga til að taka 36 svart-hvítar myndir af öllu því sem okkur fannst áhugavert. Ég tók myndir af trjám, Leó, húsum, trjám, fólki, Leó, hestum, plöntum, vekjaraklukkunni hans Leós, reykinga crewinu, trjám, Leó og plastflösku. Á mánudaginn setjum við myndirnar á pappír.

aðrar greinar sem ég mun leggja stund á næstu tvo mánuðina eru; international politik, blaðamennska og sammenspil.

...og der var en fest, en rigtig god fest.

Sólin er búin að leika við okkur danina upp á síðkastið, sól og yfir 20 síðustu 3 daga, nokkuð gott bara, svona síðsumars. Frétti að það væri rok og rigning heima...

Pigen;)

2004-09-06T13:12:00.000+02:00

Danskur morgunmatur:
2dl súrmjólk
2dl kellogs corn flakes
ein skeið af rúsínum
fyllist upp með púðursykri eftir smekk (ca. 5-7 stórar skeiðar)

Annars er allt í góðu gengi hérna í Brandbjerg. Það er búið að vera brjálað að gera alla vikuna og gærkvöldið var eiginlega fyrsti frítiminn okkar síðan við komum hingað. Stíft prógram. /Leó

nog plass fyrir alla

2004-09-03T15:27:00.000+02:00

Það liggur við að það sé auðveldrara að vera eina grænmetisætan í 70 manna skóla en á sínu eigin heimili. Þar er enginn sem segir "Æ Hildur mín, viltu nú ekki allavegana smakka á lærinu, færð þér bara smá sósu út á það", nei, í 70 manna skólanum er bara sagt; "Þeir sem eru ekki grænmetisætur eiga að láta matinn merktan "aðeins fyrir grænmetisætur" vera!!!"

Veit núna (ekki það að ég hafi ekki vitað það fyrr) afhverju fólk er með hurðar á húsinu sínu, en það er til þess að óboðnir gestir komi ekki inn. Bravo fyrir Hildi!!! Fengum einmitt einn slíkan í gær. Hann var á stærð við golfkúlu, grænn og slímugur. Við skírðum hann Kermit.
Höfum ekki haft fyrir því að skíra allar þær óteljandi, risa hrossaflugur sem ætla sér að taka yfir herbergið okkar. Né heldur vinkonur þeirra kóngulærnar, en þær eru einnig stærri og óvinalegri en við eigum að venjast heima á klakanum. Margfætlur þessar láta sér ekki nægja að hanga í ljósakrónunni heldur finnst þeim líka mjög gott að vera á teppagólfi (svo maður sjái þær örugglega ekki fyrr en fyrr en maður er búin að stíga á þær), í sturtunni, gardínunum og á sænginni minni. En það er allt í lagi, rúmið er stórt og pláss fyrir alla.

Á morgun opnar barinn. Þetta er sko enginn "Tónó" bar, með litlum ískápum undir eldhúsborðinu á einhverri skrifstofu. Nei, þetta er bar með barborði og 6 barstólum. Á barnum eru einnig nokkrir hægindastólar, svið og ljóskastarar. Aðeins er leyfilegt að selja bjór og léttvín á barnum.

úti er sól og sumar

Damen;)

Ostar og kex

2004-09-01T17:40:00.000+02:00

Þetta er þriðij dagurinn minn í skólanum og ég trúi því varla að þetta lúxuslíf sem ég lifi hér eigi eftir að halda áfram. Við búum í mjög fínu herbergi með tveimur rúmum (sem við ýttum saman), skrifborði, lampa, hillu, skápum og öllu tilheyrandi. Og auðvitað erum við líka með sítengingu fyrir tölvurnar. Svo er maturinn hérna eins og á hóteli. Við fáum alltaf nýbakað brauð á morgnana (ennþá rjúkandi heitt) og súrmjólk. Við getum valið um margar tegundir af múslí og morgunkorni, svo getur maður skellt jarðaberjum út í ef maður vill. Í hádeginu í gær fengum við rauðsprettu með kartöflum og svo var "léttur" matur um kvöldið. Fyrir þá sem ekki vita þá er léttur matur í Brandbjerg: ostar og kex, melónur, roastbeef og remolaði, einhverskonar rúllur með kjöti inni í og svo eitthvað meira sem ég veit ekki hvað heitir. Og svona er þetta á hverju kvöldi.
Síðustu daga erum við búin að vera í alskonar leikjum til að kynnast. Þetta eru jú 70 manns sem ég þarf að kynnast. En í dag hættum við að leika okkur og áttum að velja okkur fög til að stúdera næstu tvo mánuðina (svo velur maður aftur eftir tvo mánuði). Ég valdi Jazz-skole, groove, masage og vocal performance, hlakka mikið til. Ég er semsagt í þremur tónlistar kúrsum og nuddi (svona til að slaka á).Svo byrjar skólinn að einhverju marki á morgun. /Leó

Á fóninum: Yes / I've seen all good people

það verður ekki aftur snuið

2004-08-31T17:50:00.000+02:00

okey, það verður ekki aftur snúið, ég mun aldrei getað lifað eðlilegu lífi aftur. Að vaska upp, læra heima eða fara út í búð eru hugtök sem eru horfin úr huga mínum.

Damen:)

Kebab 9/11

2004-08-27T20:30:00.000+02:00

Flugið gekk vel, bara svona eins og það gerir yfirleitt held ég. Við tókum svo lestina frá Kastrup til Nørreport og röltum með níþungar ferðatöskur niður á Nørregade, þar sem Anna María, frænka Hildar býr. Íbúðin hennar er það sem myndi útleggjast sem hipster-íbúð nokkurskonar. Þetta er á sjöttu hæð og engin lyfta er til staðar, og auðvitað dröslar herramaðurinn báðum 30 kg töskunum upp (í tveimur ferðum). Þetta er stúdíóíbúð og þar er m.a. að finna listaverk sem maðurinn hennar Önnu Maríu hefur gert, og eru öll í í miklum and-stríðs-anda (er til betra orð yfir það?). Aðrir markverðir hlutir sem prýða lejligheden eru staflar af geisladiskum, plötum, listrænum bókum, hljómtækjum og mörgu fleiru. Það sem sker sig mest úr er án retro-spilakassinn "Bowling Alley", sem er draumur allra spilakassaunnenda.
Þegar við vorum búin að koma okkur fyrir fórum við út í góða veðrið að njóta borgarinnar. Við fórum m.a. á Kochinis (pizzustaðinn), Rundeles (kebab) og hittum Ölmu og Jakob í Kongens have (já, það er engin leið að vera í Køben án þess að hitta MH-inga).
Þar sem við vorum búin að borða bæði kebab og pizzu og fylla þar með magan af sælum minningum síðasta sumars borðuðum við engan kvöldmat en fórum þess í stað í bíó að sjá Fahrenheit 9/11. Rosaleg mynd, segi ekki meira. Eftir myndina, sem er nokkuð löng, fórum við á röltið um bæinn, fylgdumst með mishæfileikaríkum götulistamönnum og komum okkur svo heim í háttinn. Fínn dagur bara./Leó

Heavy shopping in Peru

2004-08-27T08:45:00.000+02:00

Hej,hvordan gar det, alle sammen???

Þið vitið, Hildur eða Ásgeir, er munurinn nokkuð svo mikill??? Svona fyrir utan háralitinn og sérstök kynjaeinkenni held ég að það sé ekki neitt annað en bara kærasta til 13 mánaða og góður vinur, just about the same.

Hélt ég myndi míga á mig af hlátri við að horfa á ósofinn og flugþreyttan manninn rogast með sitthvora 30 kílóa töskuna upp á sjöundu, löngu komin upp með bakpokann, fríhafnarpokann og flugfreyjutöskuna (sem var svo gott sem tóm því hún er ætluð undir vörur sem keyptar verða í landinu danska). En ég meina hvað átti ég að gera, fara að bera töskuna mína upp sjálf???Haaallló held ekki!

Strikið, þið vitið, þetta eina sanna, þessi aðalgata sem liggur i gegnum höfuðborg Danmerkur, ja, ég vildi bara segja ykkur að það er þarna ennþá. Og viti menn það eru ennþá um það bil 5 stykki HM búðir þar og jú, viti menn þær eru ennþá jafn flottar og af einhverri ástæðu virðast þær alltaf aðeins ódrýrari en síðast þegar maður var þar. Skil ekki afhverju, kannski íslenskt verðlag hafi eitthvað með það að gera, ætla samt ekki að vera með neinar fullyrðingar hérna.
Strikið var gengið, ekki bara einu sinni, heldur nokkrum sinnum. Leó stefnir óðfluga í að verða götulistamaður Reykjavíkur númer eitt enda bættist við einn bolti og "devil sticks" í leikfangasafnið hans í dag.Ekki veit ég hvernig hann ætlar að fara að því að æfa sig með þetta allt saman en kannski gerist þess ekki þörf þar sem hann virðist hafa meðfædda hæfileika drengurinn.

Mín lét ekki sitt eftir liggja i peningaeyðslunni og nældi sér í tvenn sokkabuxnapör, 4 sokkapör og STÓRA tösku, allt MJÖG nauðsinlegt í lýðháskóla.

Ef þið misstuð af söngkonunni Susana Baca á listahátíð og voruð ekki á tónleikunum hennar í Köben i kvöld og þið búið ekki í Peru, þá bara aumingja þið. Konan og hennar fylgdarmenn eru bara messta snilld. Fyrir utan það að vera gott tónlistarfólk þá virðast þau skemmta sér meira við að spila heldur en þríeykið í "60 mínútum" við að kvelja fólk. Spilað var á hin alls kyns áslátturshljóðfæri, spónaplötukassa og skinntrommur, skeljar og fleira sem undirrituð kann ekki að nefna. Stóð þessi snilld yfir í rúma tvo tíma og yfirgaf fólkið salinn alveg mjög sátt.

Það verður ekki hjá því litið að rauðvínsglösin á Köbenhavns Jazzhouse eru skítugri heldur en sokkarnir sem þið eruð í núna!!!

Damen:)

Fartölva í flugvél...

2004-08-25T18:16:00.000+02:00

Sælinú. Hér sit ég eins og vitleysingur með fartölvu í flugvél. Við Hildur erum á leið til Køben að hafa það gott í nokkra daga. Svo liggur leiðin til Brandbjerg Højskole á Jótlandi þar sem við ætlum að skemmta okkur og gera einhverja vitleysu.
Við tókum flugrútuna í morgun klukkan 05:15 og vorum komin út á völl um sex leytið. Við fórum í check-in röðina og ég fór að sækja miða til að merkja töskurnar. Mér tókst ekki betur til en svo að ég merkti töskurnar hennar Hildar með nafninu hennar, heimilisfangi og símanúmerinu hans Ásgeirs. Ekki veit ég afhverju. Ég nefnilega man aldrei númerið hans, en þarna var það samt, á merkimiðunum hennar Hildar, sem ég hafði sjálfur merkt. Skrítið.
Merkilegt samt hvað lítill farangur getur vegið mikið. Við vorum nefnilega með alveg 13 kg í yfirvigt, en samt ekki með svo mikinn farangur, að okkur fannst.
Við erum kominn með fiðring í magann og erum búin að sitja í flugvél Iceland Express í rúma klukkustund. Annars veit ég ekki afhverju fólk kallar þetta fiðring. Þetta minnir mig miklu frekar á ógleði.
Við lendum uppúr hádegi í Køben og ætlum að fá okkur eitthvað gott að borða. Ótrúlegt hvað maður verður svangur í svona flugvélum.

Staðreynd dagsins: Hávaðinn sem er stanslaust inni í þessari flugvél mælist 8 db. Ég veit ekki alveg hvernig það er í samanburði við annan hávaða. Getur varla verið hættulegt. /Leó